Зургийн эх сурвалж: MPA
Ховд аймагт мал, амьтны гоц халдварт болон халдварт өвчнөөс урьдчилан сэргийлэх “Халдваргүйжүүлэлтийн аян” зохион байгуулна.
Тус аяны үйл ажиллагаа нь ирэх зургаадугаар сар хүртэл хоёр сарын хугацаанд үргэлжилнэ. Энэ хүрээнд мал эмнэлгийн байгууллагаас холбогдох баримт бичиг, дүрэм журам, ажлын төлөвлөгөө боловсруулан баталсан байна.
Мөн 17 сумын Мал эмнэлгийн тасагт нийт 30 сая төгрөгийн өртөг бүхий шаардлагатай халдваргүйтгэлийн тоног төхөөрөмж, 550 кг халдваргүйжүүлэлтийн бодис, хамгаалах хэрэгсэл олгов.
Энэхүү аяныг бүх нийтийг хамарсан бүтээлч ажил болгон, сум, багийн Засаг дарга нар, Мал эмнэлгийн үйлчилгээний нэгжүүд, малчид, иргэдийн оролцоотойгоор баг бүрт ажлын баг гаргаж, бэлтгэл хангаж байна.
Улмаар дөрөвдүгээр сарын 15-ны өдрөөс эхлэн өвөлжөө, хаваржааны хашаа хороо, малын өтөг бууцыг халдваргүйжүүлэх, бэлчээр, уст цэгийг цэвэрлэх, хорогдсон мал, амьтны сэг, зэмийг устгах ажлыг нэгдсэн зохион байгуулалттайгаар чанартай гүйцэтгэхийг сумдын Мал эмнэлгийн тасгийн тархвар зүйч, улсын байцаагч нарт үүрэг болгож, мэргэжил арга зүйн заавар, зөвлөмжөөр ханган ажиллаж байна гэж Ховд аймгийн Мал эмнэлгийн газраас мэдээллээ.
Ховд аймгийн ихэнх суманд малын гоц халдварт шүлхий өвчин гарсан. Улмаар мэргэжлийн байгууллагуудын зүгээс малын гоц халдварт шүлхий өвчний тархалтыг бууруулах чиглэлд анхаарч ажиллаж байгаа бөгөөд өвчний голомт хараахан арилаагүй байна.
0 cэтгэгдэлтэй