Товчхон
               

Унгарын анхны эмэгтэй Ерөнхийлөгч тангаргаа өргөжээ

               
2022-05-16 0

Унгар улсын түүхэн дэх анхны эмэгтэй Ерөнхийлөгчөөр сонгогдсон Каталин Новак тавдугаар сарын 14-ний өдөр тангаргаа өргөж, үүрэгт ажилдаа орлоо.

Өнгөрөгч гуравдугаар сарын 10-нд Унгарын парламент Каталин Новакийг шинэ Ерөнхийлөгчөөр сонгож, эрх баригч ФИДЕС намаас нэр дэвшигч тэрбээр энэ албан тушаалд сонгогдсон анхны эмэгтэй болсон билээ.

Каталин Новак нь өмнөх Ерөнхийлөгч Янош Адерийг залгамжилж байгаа бөгөөд ирэх таван жил төрийн тэргүүнээр ажиллах юм. Өдгөө 44 настай Каталин Новак нь Унгар улсын Сегед хотод төржээ. Нөхөр, гурван  хүүхдийн хамт амьдардаг.

Унгараас гадна франц, англи, герман хэлээр чөлөөтэй ярьдаг тэрбээр Корвинусын Их сургуулийг эдийн засагч, Сегедийн Их Сургуулийг хуульч мэргэжлээр төгсжээ.

2001 онд Гадаад хэргийн яамнаас ажлын гараагаа эхлүүлж, 2012 онд Хүний нөөцийн яамны нарийн бичгийн дарга, 2020 онд сайд болон дэвшжээ. 2017-2021 он хүртэл Унгарын хамгийн том нам болох ФИДЕС намын дэд ерөнхийлөгчийн албыг хашиж байхдаа 2018 онд парламентын гишүүнээр сонгогдсон байна.

Холбоотой мэдээ